ابوذيات للعشرة الاولى من محرم الحرام

(1)
المحب لمصابك بعينه يرادم
وهظم بالهظم بكليبه يرادم
صدك من منحرك بالطف يرادم
يريت ادماي مودمك سريه
(2)
يمن بيك الجنان اصبح رضاهه
رضاة الباري من امك رضاها
شلون الظالم ظلوعك رضاهه
وسحكهه بخيل حقده عللوطيه
(3)
يماي النهر جف عباس جفاك
رفض يشرب لذيذ الماي جفاك
صحت عباس وسفه انكطع جفاك
وهو سوّه فلك بالغاضريه
(4)
الجيوش عللنهر سيفه نهرهم
واسود صار برض الطف نهرهم
بكبر العلكمي اصبح نهر هم
على جفوفه الهوت بالغاضريه
(5)
الخيم بالنار ظالم ويّراها
اليصدها اتهمل عينه واليراها
يعظم الله العقيله ويّراها
على مصاب الحصل بالغاضريه
(6)
صحت من جار دهري يابه يابه
شجنيت وعلي ضيمه يابه يابه
صحت بالطف يحيدر يابه يابه
مضن ترضه الحرم تمشي سبيه
(7)
موش ابعيده عنك ماني يمك
اخذ دلالي يبني ماني يمك
يجاسم صحت يبني ماني امك
جبت ليك الشموع ابين اديه
(
عليك من الخيم شاطت حرمنه
يجسام الوكت منك حرمنه
علينه الماي من بعدك حرمنه
نشربه شلون وانت عللوطيه
(9)
يبني من الصبه الدلال لك بار
من اشوفك ماتضل جروح لكبار
شلون اتعيفني ياعلي الكبار
وانه امك والكلب ناره سريه
(10)
المصابك كل حزن يبني هوه انته
وجنت للروح يوليدي هوه انته
شعندي من الولد يبني هوه انته
ورحت والمهد خالي ابين اديه
(11)
اطلع همومي كلهه وانته ضامي
يروحي ودار فكري وانتضامي
ادري بنار جبدك وانت ضامي
يبني وماي ماصحش بديه
(12)
قصر لوعه وقصر حسره وقصر هم
الوكت عل مانصر مسلم قصرهم
يون عليه من شافه قصرهم
انذبح فوكه ورموه عللوطيه
(13)
الصخر من شافني وضيمي علي وين
ولهب فكدك صعد يبني عله وين
شكل للي يناشدني علي وين
اكله اوذار جسمه عللوطيه
(14)
الدمع من جفن عين الكلب سل سل
وعلى حالي حمام الدوح سل سل
مصاب حسين للدلال سل سل
وعمه عيوني وخلص كل حيل بيه

احسنتي بارك الله فيك
هذا كله محسوب لكم في يوم
لا ينفع مال ولا بنين
صدقوني يا اخون ما في كلمه
تكتب في هذا الموقع الى الامام
الحسين الى ويجازيه الله عليه يوم
القيامه يوم لاينفع مال ولا بنين
ياربي نتمنى من كل رواد هذا الموقع
ان يكتبو شي في الموقع ليكون لهم ذخرا
وذخيرتا في الدنيه والاخره

احسنتِ


ابوذيات رائعه



جعلها الله في ميزان حسناتكِ